بحث في الموقع :
-بدء الحفريات الاثرية الاسرائيلية في خسفين في الجولان المحتل          -اسرائيل : رقم قياسي في معدّل الأجر الشهري          -عرض لأطروحتي الدكتوراه لـ د. يوسف بريك و-د. تيسير الحلبي في اعدادية مجدل شمس          
موقع الجولان >> الصفحة المحلية >> الــزاويــة الـــثقــافــيــة  >>
قصيدة من وحي يوم العودة الى فلسطين
  28/05/2011

 قصيدة من وحي يوم العودة الى فلسطين

موقع الجولان

 

مشاركه من الاخ جاد سعديه ..كلمات الاغنيه للاستاذ مصطفى حطيني

من اليوم ورايح غنوّا غنية
لاعراس العودة الفلسطينية
والعودة ثورة ونصر وحرية
...وشكراً لكل اللي ساعادونا

في ذكرى النكبة تلاتة وستيني
طلعت مسيرة لاجل فلسطيني
أمة محمد ما راح تنسيني
وفي عنّا أمل تأيدونا

من الشتات وطلعت مسيرة
لحق العودة وتقرير مصيري
هي يا شباب ويا أهل الديرة
مشّوا عل جولان يلاّ لحاقونا

من كل البلاد وطلعت باصاتِ
إبني وأبوي ومرتي وإخواتي
نهتف ونّادي دمي وحياتي
كلّوا لتراب الوطن مرهونا

من مجدل شمس لعين التينة
أنا فدائي يُمَّا شوفيني
حقل الألغام مشتوا بيقيني
عل جنة رايح أو ع فلسطينا

أوَّل ما نزلنا شي الف ومية
غنينا يما عاالرباعية
وردَّت علينا فوراً دورية
رصاص وقنابل تا يخوفونا

تلاتميِت متر من الألغام
والتينة خلفي المجدل قدَّامي
الطريق الفاصل بعد الألغام
ومسيَّج يما من الجانابينا

تخيلتك يما بيوم النكبة
تنادي من المجدل تعا يا قلبي
صارخت بصوتي وكبرت ربي
وهاجمنا على بني صهيونا

نحمل بالإيد حجارة من التينة
ورمينا العدو باسم فلسطينِ
سياج المعدني شلتو بيميني
كرمال المجدل كرمال عيونا

كانوا سبع جنود واقفين قبالي
يرموا علينا واحنا عزّال
تجاوزت الحاجز جوَّا المجدل
وصليِّت عتراب الوطن الحنونا

وهم و عالفاضي دستو بسهولة
مافي حواجز لسهل الحولة
يا ربعي و أهلي ويا هالحمولة
بالمرة الجاية عافلسطينا

أول ما فتنا مع الحبايب
هربوا يا يما متل الأرانب
وتلات مِت شب يصيحوا من القلب
الله أكبر يا فلسطينا

شاباب المجدل لما لاقانا
سطرنا معهم وحدة دمانا
كفَّنوا الشُهدا وداووا جرحانا
وكلّو لعيون الوطن يا عيونا

شباب المجدل لما تلاقينا
سطرنا معهم وحدة أراضينا
بصل وكولا وميه عِطيونا
من الغاز الخانق تا ينقذونا

الأعلام اللي كانت مع الشبابِ
ترفرف بالعالي فوق السحاب
عَ جيب العدو عَ بيوت احبابي
بساحة المجدل غنَّت دلعونا

ونصبنا الدبكة بمجدل شمسِ
وحوَّلنا يوم النكبة لعرس
شتَّان الفرق بين يومي وأمسي
و جيشوا متربص تا يقضي علينا

وبعد ما وعيوا جند اليهودي
جابوا إمداد وفتحوا البارودي
وانا متمسِّك بأرض جدودي
صار جرحى وشهدا لاجل فلسطينا

قيس ابو الهيجا وبشار شهابي
عبيدة الزغموت زين الشباب
هاجاموا على جند الإرهاب
وصار الهيلوكوبتر يرمي علينا

لميت ترابا حبه عا حبه
شلتن بإيدي زرعتن بقلبي
واسعاف الجرحى ودخلك يا ربي
بدنا نوصلهن تا يسعفونا

سبحانه ربي هاي الإرادي
الشب اللي جنبي نال الشهاده
مبروك وقسماً يا اهلي يا ولادي
هدا هُوِّ درب النصر يا عيونا

انسحبنا يما حاملين الجرحى
وشهدا عالكتاف مرحى عا مرحى
يا أمة الله كرموا اللي ضحى
وحيوا اللي بيشارك باسم فلسطينا

منحيي الشهدا وكل اللي شارك
واللي متصاوب يا ريتو مبارك
والله يغفرلك يا حسني مبارك
ما بدنا الحل البوس وتحضينا

ونظرة للمجدل لاشوف اخواتيٍ
سبعين فدائي رجال و بنات
ظلوا بالداخل أصعب ساعات
وبعد التدخل طلعوا لهونا

جابوا معاهن مية مجدل شمس
كإنها زمزم وترابا مقدس
رصاص وقنابل لموا من العرس
تانعمل حفلة بفلسطينا

حملنا ترابا حتى نتذكر
وحملنا حجار وجبنا ورد احمر
يا عالم قولوا للي بيتنكر
والعودة حق و واجب علينا

لا تغسل بوطك ولا جراباتك
ولا قميصك عليه دماتك
بنطال مزع خليه بحياتك
ذكرى للعرس الأول يا عيونا

نصبنا الدبكة بمجدل شمسِ
وحولنا يوم النكبة لعرس
واللي ما شارك من بني جنسي
بالمرة الجاية بيشاركونا

بخلوا علينا بنشرات الأخبار
كإنو يما ابداّ ما شي صار
ولأنو دورثي غابت كم نهار
على الجزيرة يما صرعونا

شوف البي بي سي شوف الجزيرة
بتحس بغصة وحسرة مريرة
الله وأكبر يا أهل الديرة
حتى بالنصر ما بغطونا

هلت بشاير من هالبلادي
أربعة فاتوا عأرض أجدادي
مجد داوود و عزت مسودة
مع رشا فياض بنت فلسطينا

بكل الفخر والاعتزازي
وصَّل عا يافا حسن حجازي
بكفِّي شافا ويا ربي جازيه
وصلنا اخوتنا عا فلسطينا

يا شعبي العربي من المية للمي
في عنا فكرة وركزوا معي شوي
مواجهة العدو كشربة المي
تعالوا شوفوا بتصدقونا

ياعين التينة ويا مجدل شمس
نحنا عا موعد تاني للعرس
خلي اللي بدوا قاعد ع الكرسي
واحنا زحفنا لا توقفونا

أنا فدائي سوري موريتاني
أنا فلسطيني مصري و لبناني
أنا من اليمن أنا سوداني
أنا من الأردن يا نور عيونا

حيوا سوريا لبنان و الداخل
مصر و الأردن و لبدو يناضل
و ما حدى قصر ولا بيماطل
وخلينا نغني على دلعونا

و على دلعونا يلي تحبيني
المجدل ذكرنا بصلاح الدين
لأكتب كتابك بعين التينة
و أعملك حفلة بفلسطينا

عَقّب على المقال                    طباعة المقال                   
التعقيبات